Âşık isen eyle teslim canını cânâna gel

Âşık isen eyle teslim canını cânâna gel
Ta ki bir rah-i hakikat bulasın Sübhan'a gel

Çün taabbüd eyleyenler oldu mahbub-i Huda
Pek nazar kılma sivaya âmil-i Kur'ana gel

Suret-i insan hicab-ender-hicab-ı gafilân
Sür çıkar dilden hicabı sıdk ile fermana gel

Eyleme bag-i fena'da ruz ü şeb ah ü enin
Andelib-i vasl isen tevhid ile gülşana gel

Evc-i rif'at sana menzil ola zikrullah ile
Sidre üzre zümre-i uşşak ile cevlâna gel

Eyle tekmil-i meratib, bul hayat-i cavidan
Talib isen ilm-i sırra mekteb-i irfana gel

Nuş edersen bir kadeh câm-i muhabbetten bugün
Seyredersin on sekiz bin âlemi mestane, gel

Cezbe-i envar-ı Hak ihsan olursa KENZİYÂ
Bir olur maruf ü ârif, lûtfuna şükrana gel
alıntı